పాత పెన్షన్ స్కీమ్ (OPS) అవకాశం కల్పించాలి: కాంట్రాక్ట్ MPHA (Male) ఉద్యోగుల విజ్ఞప్తి

01.09.2004 కంటే ముందు విడుదలైన నోటిఫికేషన్ ద్వారా రిక్రూట్ అయ్యి, ఆ తర్వాత క్రమబద్ధీకరించబడిన MPHA (Male) ఉద్యోగులకు పాత పెన్షన్ విధానం (OPS) కిందకు మారేందుకు ఒకేసారి అవకాశం (One-Time Option) ఇవ్వాలని కోరుతూ ప్రభుత్వం దృష్టికి తీసుకెళ్లడం జరిగింది.

జీవో సంఖ్య 53 (G.O.Ms.No.53) నేపథ్యం:

ఆర్థిక (HR.III-Pension & GPF) శాఖ విడుదల చేసిన G.O.Ms.No.53 (తేదీ: 13.07.2026) ప్రకారం... 01.09.2004 కంటే ముందే రిక్రూట్‌మెంట్ నోటిఫికేషన్ లేదా ప్రకటన వెలువడి, ఆ తర్వాత విధుల్లో చేరి CPS పరిధిలోకి వచ్చిన ఉద్యోగులకు OPS ఎంచుకునేందుకు అవకాశం కల్పించారు. కేంద్ర ప్రభుత్వ విధానాన్ని ప్రామాణికంగా తీసుకుని, అసలు రిక్రూట్‌మెంట్ నోటిఫికేషన్ వచ్చిన తేదీనే అర్హతకు ప్రధాన ప్రాతిపదికగా ఈ జీవోలో స్పష్టం చేశారు.

MPHA (Male) ఉద్యోగుల కేస్ వివరాలు:

1. అసలు నోటిఫికేషన్: MPHA (Male) పోస్టుల నియామక ప్రక్రియ G.O.Rt.No.459 (తేదీ: 22.05.2002) ద్వారా ప్రారంభమైంది. ఇది 01.09.2004 కంటే చాలా ముందే జరిగింది.

2. కోర్టు కేసులు & ఆలస్యం: ఆ నోటిఫికేషన్ ఆధారంగా కొందరు 2003లో, మరికొందరు 2006లో నియామకం పొందారు. అయితే గౌరవనీయ ఆంధ్రప్రదేశ్ హైకోర్టు మరియు సుప్రీంకోర్టులలో నడిచిన మధ్యంతర ఉత్తర్వుల వల్ల ఈ నియామకాలు తాత్కాలికంగా జరిగాయి.

3. జీవో 273 వెలువడటం: న్యాయపోరాటం ముగిసిన తర్వాత, కోర్టు తీర్పుల ఆధారంగా ప్రభుత్వం G.O.Rt.No.273 (తేదీ: 16.02.2012) ని జారీ చేసింది. దీని ద్వారా మెరిట్ జాబితా రూపొందించి కాంట్రాక్ట్ నియామకాలు ఇచ్చారు. ఇది కొత్త నోటిఫికేషన్ కాదు, కేవలం 2002 లో వచ్చిన రిక్రూట్‌మెంట్ ప్రక్రియకు కొనసాగింపు మాత్రమే.

4. రెగ్యులరైజేషన్: ఈ ఉద్యోగుల సేవలను ఆ తర్వాత Act 30 of 2023 ద్వారా క్రమబద్ధీకరించడం జరిగింది.

ప్రధాన డిమాండ్:

MPHA (Male) రిక్రూట్‌మెంట్ నోటిఫికేషన్ 22.05.2002 నాడే రావడం, ఆ ప్రక్రియ ప్రకారమే జీవో 273 ద్వారా నియామకాలు జరగడం మరియు తర్వాత యాక్ట్ 30/2023 ప్రకారం వీరు రెగ్యులరైజ్ కావడం వల్ల... జీవో 53 లో పేర్కొన్న అర్హతలన్నీ వీరికి వర్తిస్తాయి.

కాబట్టి, జీవో 273 ప్రకారం నియమితులై రెగ్యులరైజ్ అయిన MPHA (Male) ఉద్యోగులందరికీ G.O.Ms.No.53 నిబంధనల ప్రకారం పాత పెన్షన్ స్కీమ్ (OPS) ఎంచుకునే ఒకేసారి అవకాశాన్ని (One-time Option) పొడిగించాలని, ఇందుకు సంబంధించి తగిన ప్రతిపాదనలను ప్రభుత్వానికి సమర్పించాలని సంబంధిత అధికారులను, ప్రభుత్వాన్ని కోరడమైనది.

ఈ అంశంపై మీ అభిప్రాయాన్ని కింద కామెంట్ సెక్షన్‌లో తెలియజేయండి.